లేనిదేముంది..(కరపత్రం)- డా. చింతకింది శ్రీనివాసరావు

నీకు.. లేనిదేముంది
నీది.. కానిదేముంది
సింహాద్రి అప్పన్న గంధం ఉంది
తిరుపతి వెంకన్న బంధం ఉంది
ఫెళఫెళలాడే పెన్నా ఉంది
గలగలలాడే గోదారుంది
బావికొండలో బౌద్ధం ఉంది
అమరావతిలో తీర్థం ఉంది
విరివిగపండే పల్లం ఉంది
తరగల నురగల సముద్రముంది
పేదల ఊటీ అరుకుంది
అందాల హంసలదీవుంది
భీమిలి ఉంది, కావలి ఉంది
నావికాదళాల స్థావరముంది
విశాఖ వాకిట ఉక్కుంది
తూర్పు కనుమపై హక్కుంది
ఉత్తరదిక్కున సిరిమానుంది
బాబామెట్ట దీవిస్తోంది
నన్నయ్యస్ఫూర్తి భారతముంది
అన్నమాచార్య గీతం ఉంది
వేమన్న చెప్పిన వేదం ఉంది
త్యాగయ్య మీటిన నాదం ఉంది
గుర్రం జాషువా పద్యం ఉంది
బొబ్బిలి వీరుల రోషం ఉంది
పలనాటి బ్రహ్మన్న మీసం ఉంది
నీ నరాల్లో నెత్తురు ఉంది
నీ కణాల్లో సత్తువ ఉంది
నీ చేతుల్లో నవ్యాంధ్ర ఉంది
నీ చేతల్లో భవ్యాంధ్ర ఉంది
నీకు.. లేనిదేముంది
నీది కానిదేముంది
- డా. చింతకింది శ్రీనివాసరావు
(కొత్త రాష్ట్రంపై కోటి ఆశలతో..
నవ్యాంధ్ర ప్రజాళికి శుభాకాంక్షలతో..)ఆంధ్ర జ్యోతి సౌజన్యముతో